а)   Застава (длужина и ширина у розмири 2:1) зоз трома горизонталнима полями шлїдуюцих фарбох: белава на верху, у висини єдней половки (двох штварцинох) застави, била у штредку застави, у висини єдней штварцини застави и червена на сподку застави, у висини єдней штварцини застави. У штредку застави герб котри предложени як заєднїцки за шицких Руснацох/Русинох/Лемкох швета.

          б)  Герб исти як и тот котри предложени як заєднїцки за шицких Руснацох/Русинох/Лемкох швета, а на котрим карпатски медведз на правим боку и 4 белави и три златни поля на лївим боку, з тим же окремносц Руснацох у Сербиї на гербу виражена зоз билим голубом у руки карпатского медведза и зоз вертикалним польом по штредку герба, хторе символизує драгу зоз Горнїци на Долню жем, драгу Руснацох зоз сиверу на юг, зоз Карпатох до Руского Керестура, односно до Бачкей и Сриму, як и рику Дунай коло хторей Руснаци населєни.

          в) За шветочну писню Руска матка предклада композицию "Мой валал – Руски Керестур" (у народзе познатшу як "Писня Руснака") хтору компоновал Михайло Бодянец на текст поети пок. Юлияна Надя, з тим же би ше направел аранжман за шветочне виводзенє, т.є. за хор, односно одвитуюци оркестер (дуйни, симфонийски итд.)

          г)   За шветочни дзень Руснацох у Сербиї предложени 17. януар як здогадованє на 17. януар 1751. року, кед Франц Йозеф де Редл, совитнїк єй велїчества царици Мариї Терезиї и администратор Кральовско-державного Бачкого дистрикту, у Зомборе подписал перши урядови документ – Контракт о насельованю 200 руских греко-католїцких фамелийох на тедишню пустару Вельки Керестур.

Сердечни поздрав!

                                                                                          Предсидатель Рускей  матки

                                                                                                       Дюра Папуґа

РУСКИ КЕРЕСТУР - КУЛТУРА - ОБРАЗОВАНЄ

Семинар з обласци театралней дїялносци

РУСКИ КЕРЕСТУР, 4. авґуст 2006. (Рутенпрес) - Национални совит рускей националней заєднїци и Руски народни театер "Петро Ризнич Дядя" того лєта орґанизую семинар з обласци театралней дїялносци.

Семинар унапрямени баржей на младих, заинтересованих за театралну дїялносц, алє и за искуснєйших ґлумцох, та и дзеци.

Семинар з обласци театралней дїялносци будзе отримани у Руским Керестуре од 17. по 25. авґуст.

Заинтересовани поєдинци, лєбо прейґ наших КУД ше ище вше можу приявиц за учасц на семинаре - найпознєйше по 15. авґуст - на адресу: Руски народни театер “Петро Ризнич Дядя”, Русинска 75 (Дом култури); Руски Керестур, а телефони за контак (025) 704-605 и 703-032.

Семинар безплатни, а нащивителє семинара буду мац орґанизоване змесценє и костиранє у интернату рускокерестурскей Школи "Петро Кузмяк".

На семинаре буду теорийни и практични преподаваня зоз теориї и историї драми, режиї, ґлуми, сценского руху и модерноги танцу, дикциї и уметнїцкей интерпретациї текстох, сценоґрафиї и бабкарства, а преподаваче буду фаховци з обласци театралней дїялносци.

През дзень за слухачох буду отримованя преподаваня з теорийну и практичну часцу, а вечарами заплановани видео-проєкциї театралних представох з рижних школох и театралних напрямох.

(конєц)